Chapter 05 வீட்டிற்குத் திரும்பும் எலிசபெத்.

‘எல்லாவற்றையும் நினைத்துப் பார்க்கும் பொழுது, எலிசபெத், தீவிரமான யோசனைக்குப் பிறகு, எனக்கும் உன்னுடைய மூத்த சகோதரியைப்போல்தான் நினைக்கத் தோன்றுகிறது. நண்பர்களும், பாதுகாப்பதற்கு மனிதர்களும் இருக்கும் ஒரு பெண்ணிடம், கர்னல் குடும்பத்தினருடன் தங்கியிருந்த ஒரு பெண்ணிடம் இம்மாதிரி ஒரு திட்டம் தீட்ட ஒரு இளைஞனால் முடியாது என்று எனக்குத் தோன்றுகிறது. அதனால் நல்லபடியாகத்தான் முடியும் என்றுதான் நம்புகிறேன். அவனுடைய நண்பர்கள் முன்வந்து அவனைத் தடுப்பார்கள் என எதிர்பார்த்திருக்க மாட்டானா? கர்னல் பார்ஸ்டரை எதிர்த்து இவ்வாறு நடந்து கொண்டதற்கு, மீண்டும் அவன் படைப்பிரிவுக்கு வந்தால் அவனை எல்லோரும் சேர்த்துக் கொள்வார்கள் என எதிர்பார்க்க முடியுமா? இவ்வளவு துணிச்சலான காரியம் செய்வதற்கு அவனது இந்த ஆசை மட்டும் போதுமானதாக இருக்க முடியாது‘ என திரு. கார்டினர் எலிசபெத்திடம் கூறினார்.