02. ஆன்மீக மற்றும் மனோதத்துவ ரீதியான கருத்துகளுக்கு உண்டான வரையறைகள்
ஆன்மீக மற்றும் மனோதத்துவ ரீதியான கருத்துகளுக்கு உண்டான வரையறைகள்
(சென்ற இதழின் தொடர்ச்சி.....)
N. அசோகன்
51. | காலத்தைக் கடந்த சத்தியஜீவியம்: | படைப்பிற்கும், இறைவனுக்கும் இடையேயுள்ள ஒற்றுமையைத் தக்க வைத்துக் கொண்டிருப்பதும் அதே சமயத்தில் காலத்தைத் தாண்டி இருக்கின்ற சத்தியஜீவியத்தின் ஒரு பகுதி. |
52. | காலத்திற்குட்பட்ட சத்தியஜீவியம்: | படைப்பிலுள்ள வேற்றுமைகளை வெளிப்படுத்தி அதே சமயத்தில் பின்னிருக்கிற அடிப்படை ஒற்றுமையையும் இழக்காமல் இருக்கின்ற சத்தியஜீவியத்தினுடைய இரண்டாம் பகுதி. |
53. | பழக்கம்: | சத்தியஜீவியத்தின் வளைந்து கொடுக்கும் தன்மைக்கு எதிராக உடம்பில் நிலை பெற்றிருப்பதும், திரும்பத்திரும்ப நடக்கின்றதுமான செயல்பாடுகளுக்குப் பழக்கம் என்று பெயர். |
54. | ஆன்மா: | சத்தையும், சத்தியத்தையும் இணைக்கின்ற தொடர்பாக செயல்படுவதுதான் ஆன்மா. சத் தன்னை வெளிப்படுத்திக் கொள்ளும் பொழுது சத்தியம் ஆகிறது. அடுத்த கட்டமாக சத்திற்கும், சத்தியத்திற்கும் இணைப்புப் பாலமாக ஒன்று தேவைப்படும் பொழுது அந்த வேலையை ஆன்மா செய்கிறது. |
55. | சத்: | பரப்பிரம்மம் தன்னை வெளிப்படுத்திக் கொள்ளும் பொழுது முதலில் சத்தாகத்தான் வெளி வருகிறது. |
56. | அசத்: | பரப்பிரம்மத்திலிருந்து வெளிப்படாமல் அதற்குள்ளேயே மறைந்து கிடக்கின்ற விஷயங்களுக்கு அசத் என்று பெயர். இது சத்திற்கு எதிர்மறையானதாகும். உண்மையில் சத்தைவிட அசத் பெரியதாகும். |
57. | சித்: | எல்லா குணங்களையும் தாண்டி நிற்கின்ற பரப்பிரம்மம் சத்தாகத் தன்னை வெளிப்படுத்திக்கொள்ளும் பொழுது தன்னைத்தானே உணர்ந்து கொள்ள விரும்புகிறது. அப்பொழுது சித் பிறக்கிறது. |
58. | ஆனந்தம்: | இப்படித் தன்னை உணர்ந்து கொள்கின்ற பிரம்மம் தன்னைத்தானே அனுபவிக்கும் பொழுது ஆனந்தம் பிறக்கிறது. |
59. | மாயை: | மாயை என்றால் பிரமை என்று கருதப்படுவது தவறு. பகவான் கருத்துப்படி பிரம்மம் படைப்பை நிகழ்த்த விரும்பிய பொழுது தனக்கென்று ஒரு படைக்கும் திறனை உருவாக்கிக் கொண்டது. அந்த படைக்கும் திறனுக்குத்தான் மாயை என்று பெயர். |
60. | தெய்வத்தாய்: | பிரம்மத்தினுடைய செயல்படும் சக்திக்குத் தெய்வத்தாய் என்று பெயர். தெய்வத்தாயின் பிறப்பிடம் சச்சிதானந்தத்தில் உள்ள சித்-சக்தியாகும். சித்-சக்திதான் அறிவும், ஆற்றலும் நிரம்பிய இடம். இதுதான் அன்னையின் பிறப்பிடம். |
தொடரும்..... |
- Login to post comments