04. யோக வாழ்க்கை விளக்கம் VI

யோக வாழ்க்கை விளக்கம் VI

(சென்ற இதழின் தொடர்ச்சி....)

கர்மயோகி

II/90) அகண்டம் தானே விரும்பி கண்டமாகக் காட்சியளிக்கிறது.

• இது சிருஷ்டியின் இரகஸ்யம்.

• கையிலுள்ள ரொக்கத்தை பிஸினஸில் போட்டு மீண்டும் எடுக்கத் திணறும் முதலாளி ஒரு கோடி மூலதனத்திலாரம்பித்து ஓர் ஆயிரம் கோடிக்கு வருவதை நாம் காண்கிறோம்.
• பெட்டியிலேயே ரொக்கமிருந்தால் பத்திரமாக ஒரு கோடியாகவேயிருக்கும்.
• பாங்கில் போட்டிருந்தால் அவர் 1000 கோடி சம்பாதித்த காலத்தில் 5 கோடியாகியிருக்கும்.
• ரேஸ், லாட்டரியில் ஈடுபட்டிருந்தால் அழிந்து போயிருக்கும்.
• ஒரு கோடியும் முதலில்லாமல் ஒரு இலட்சம் முதல் போட்டவரும் பிஸினஸில் 1000 கோடியைத் தாண்டியதையும் நாம் அறிவோம்.
• பணத்தை மார்க்கட்டில் போட்டவருக்கு வெற்றியுடன் தோல்வியும் உண்டு.
• பிரம்மம் தோல்வியை அறியாது.
• இருள் என்ற தோல்வியை - தோல்வியின் தோற்றத்தை - பிரம்மம் ஏற்படுத்தி, அதனுள் தன்னை இழந்து மீண்டு வருவது சிருஷ்டி. அது அனந்தமான ஆனந்தம்.
• டென்னீஸ் மட்டையும், பந்தும் சொந்தமாக இருப்பது ஆனந்தமல்ல.
• சுவற்றில் அடித்து விளையாடுவது ஆனந்தம்.
• எதிர்க்கட்சியுடன் விளையாடுவது பேரானந்தம்.
• பிரம்மம் எதிர்க்கட்சி - இருளை - ஏற்படுத்தி, விளையாடி, ஆனந்தத்தைப் பேரானந்தமாக மாற்ற சிருஷ்டியை நாடியது.
• மாடு கொல்லையில் நுழைந்து நெல்லைச் சாப்பிடும்.
• மனிதனுக்கு நெல் ஒத்து வராது, அரிசியே தேவை.
• அரிசியை மனிதன் அரிசியாகச் சாப்பிடுவதில்லை. சோறாகச் சமைத்துச் சாப்பிடுகிறான்.
• சோறு பொங்கலானால், சர்க்கரைப் பொங்கலானால் சுவை கூடிக்கொண்டே போகும்.
• பிரம்மம் அரிசிபோல், சொல்லப்போனால், நெல்போல.
• பிரம்மம் சச்சிதானந்தத்தைச் சிருஷ்டித்து, அதன் புறமாக சத்திய ஜீவியத்தை இருகூறாகப் பிளந்து மனத்தை சிருஷ்டித்தும், மனத்தால் வாழ்வையும், ஜடத்தையும் சிருஷ்டித்தது. ஜடம் பிரம்மம் என்ற நெல்லுக்கு சர்க்கரைப் பொங்கலைப்போல்.
• நம் கண்ணுக்கு ஜடமாகக் காட்சியளிப்பது ஆத்மாவுக்கு, வளரும் ஆத்மாவுக்கு சர்க்கரைப் பொங்கலான விருந்தாகும்.
• நாம் சர்க்கரைப் பொங்கலை நெல் என நினைக்கிறோம்.
• அது உள்ளபடி பார்க்கும் திறனுக்கு வழியில்லை.
• எப்படிச் செய்யப்பட்டது எனக் கேட்டால் அரிசியிலிருந்து எனப் பதில் வருகிறது.
• நாம் அரிசியை எப்படிச் சாப்பிடுவது என்றும், அரிசி நெல்லிலிருந்து வருவதால் நெல் நமக்கு வேண்டாம் எனவும் கூறுகிறோம்.
• இறைவன் அனுபவிக்கும் பேரானந்தத்தை நமக்களிக்கிறான்.
• நாம் அதை ஆனந்தமாகவும் அறிவதில்லை.
• நாம் அதை வலியாக, வேதனையாக, மரணமாக ஏற்கிறோம்.
• வலியை ஆனந்தமாக மாற்றும் பாதையே பேரானந்தம் தருவது என நாம் அறியவில்லை.
• அளவு கடந்து சிரமத்தை ஏற்று, மகனைப் படிக்க வைத்து, பெரிய வேலைக்கு வந்தபின் அனுபவிப்பது பேரானந்தம்.
• தான் பட்ட அவதி வரப் போகும் ஆனந்தத்திற்குரியது.
• அன்னையை ஏற்றவர்க்கு அந்த அவதியுமில்லை.
• அவதி ஆனந்தமாகிறது. ஆனந்தம் பேரானந்தமாகும்.
• அகண்டமான பிரம்மம் விரும்பிக் கண்டமான சிருஷ்டியானது சிருஷ்டியின் இரகஸ்யம்.
• உலகில் முதலில் இதைக் கூறியது பகவான் ஸ்ரீ அரவிந்தர்.
• எவர் இதை வாழ்வில் அனுபவிக்கிறாரோ, அவரே முதலில் இதைக் கண்டவராவார்.

********

*******